Қазақстан мен Марокко азаматтарының визасыз сапар жасауына мүмкіндік беретін келісімге қол қойылды. Бұл құжат екі ел тұрғындарының 180 күн ішінде 30 күнге дейін визасыз жүріп-тұруына рұқсат береді. Келісім Нью-Йоркте өткен БҰҰ Бас Ассамблеясы сессиясы аясында сыртқы істер министрлері тарапынан бекітілді.
Келісімге сәйкес, халық жарамды ұлттық немесе жалпыазаматтық паспорттарының негізінде бір-бірінің аумағына визасыз кіріп-шыға алады. Алайда әр сапардың ұзақтығы 180 күн ішінде 30 күннен аспауы тиіс. Сондай-ақ азаматтардың паспорттары жарамдылық мерзімі аяқталуына кемінде үш ай қалғанға дейін күшінде болуы керек.
Мемлекет басшысы Қасым-Жомарт Тоқаевтың сыртқы саясатқа ерекше көңіл бөлуі Қазақстанның түрлі елдермен өзара тиімді байланыс орнатып, әлемдік аренадағы позициясын нығайтып келе жатқанын көрсетеді. Бұндай қуанышты жаңалыққа желі қолданушылары: “Тек фильмде көретін едік, енді өз көзімізбен кино болып саяхаттайтын болдық”, “Нығыса билет бағасы да шешілсінші өтініш. Ато Дубай мен Турцияға бара беріп, жалығып кеттік”, — деп пікір білдіруде.